विद्यापीठ अनुदान आयोगाने ठरवून दिलेल्या ध्येय-धोरणानुसार आधुनिक जगाचा इतिहास: १९२० ते १९६० (Modern World: 1920-1960) हे बी. ए. तृतीय वर्षः सहावे सेमिस्टर करिता या वर्गासाठी मराठी भाषा अभ्यासमंडळाने संपादित केले आहे. पदवी आणि पदव्युत्तर पातळीवर दर्जेदार, उच्चप्रतीचे, व्यवसायाभिमुख आणि सर्वव्यापी शिक्षण दिले जावे याकरिता केंद्र सरकारच्या मानव संसाधन आणि विकास मंत्रालयाने तसेच विद्यापीठ अनुदान आयोगाने जी मार्गदर्शक तत्त्वे आणि धोरण निश्चित केले आहे त्याची मातृभाषेशी आणि वाङ्मयाशी योग्य सांगड घालण्याचे धोरण राष्ट्रसंत तुकडोजी महाराज नागपूर विद्यापीठाने अत्यंत विचारपूर्वक आणि दूरगामी स्वरूपात स्वीकारलेले आहे. त्याकरिता विद्यार्थ्यांच्या ज्ञानार्जनाचे यथार्थ मूल्यमापन करण्याच्या व त्यांच्या ज्ञानकक्षा विस्तारित करण्याच्या उद्देशाने आवश्यक ते बदल करण्याचा योग्य निर्णयही घेतलेला आहे. त्याच दृष्टिकोनातून मराठी भाषा अभ्यासमंडळाच्या मार्गदर्शनाखाली 'आधुनिक जगाचा इतिहास: १९२० ते १९६० (Modern World: 1920-1960)' या पाठ्यपुस्तकाची निर्मिती पाठ्यपुस्तक समितीने केली आहे. पाठ्यपुस्तकामध्ये सोव्हिएट रशिया - पंचवार्षिक योजना, हिटलर - परराष्ट्र धोरण, मुसोलिनी - परराष्ट्र धोरण, चीन-जपान युद्ध (१९३७-१९३९), द्वितीय महायुद्धाची कारणे, संयुक्त राष्ट्रसंघ: रचना व कामगिरी, शीतयुद्ध, नाटो, सीटो, वॉर्सा करार, आशियाचे निर्वसाहतीकरण, इस्रायलची स्थापना, अलिप्ततेचे धोरण आणि सुवेज समस्या इत्यादींचा अभ्यासक्रम दिला आहे.
